أنا فى المطبخ اجبارى

امبارح الاربعاء وما كانش فى دماغى ادخل المطبخ اعمل حاجه جديده 
بس لانى زوغت من الشغل ولانى كالعاده اتقفشت من المديره 
قلت يا بت يا دودو ادخلى اعملى حاجه جديده حتى الزوغان يبقى جه بفايده 
عملت فطائر الاقماع 
المقادير 
ودى مقادير عجينتى المعتمده لكل المعجنات ( بيتزا -باتيه -كعكه شم النسيم -بريوش )
كيلو دقيق ...3زبادى...كيس لبن بودره ...3ملاعق زيت ....قطعه خميره.....ماء دافىء للعجن 
الطريقه
 دوبى الخميره فى ربع كوب ماء دافىء وملعقه سكر وسيبيها تخمر
اعجنى كل المكونات مع بعض مع اضافه الخميره واعجنى لمده لاتقل عن ثلث ساعه ما انا فاضيه ومزوغه باه
سيبيها تخمر فى مكان دافى وبعدين افرديها

وقطعيها شرايط طويله

هاتى القمع المعدنى ده

لفى شريط العجينه على القمع من اوله لاخره

ادهنى وش العجينه بيض ولبن ورشى سمسم وحبه البركه 
دخليها الفرن 

ولما تطلع اسحبى القمع من قلب العجينه حيطلع زى القرعه من الضفيره
واحشيها الللى تحبيه 

انا عملت حشوتين ( جبنه فيتا بالفلفل والنعنناع)
(تونه بالمايونيز والفلفل والزيتون الاخضر )
وبافى العجينه عملت بيها مينى بيتزا 

حتسألونى
1- القمع منين ؟ حقولك من المنشيه من عند السيد مطير بتاع لوازم الحلوانيه 
2- سعر القمع ؟ حقولك 3.5 
3- هل له استخدامات تانيه ؟ حقولك واااااااااااااااااااااااو تعملى بيه أحلى كنافه كورنيه حعملهالكم الاسبوع الجاى ن شاء الله 
4- هل التزويغ عدا على خير ؟ حقولك طول ما عندك مديره عسل زى مديرتى زوغى وفى بطنك بطيخه صيفى