شيكو شيكو شيكو لاته

حاجه حلوه جديده ولذيذه اللى بيحب الشيكولاته بس هو الى يدخل
المقادير 
1/4 كيلو شيكولاته مطبخ وما تشتريش اى نوع اشترى نوع اسمه سويفكس ب 5.75 حلو ونتايجه مضمونه وهو عند فتح الله 
الطريقه 
سيحى الشيكولاته على حمام مائى 

 هاتى قالب زى ده من قوالب الثلج البلاستيك 

 بفرشاه او بالمعلقه ادهنى القالب بالشيكولاته كده 

ادهنى مش تمليه على الاخر عشان لسه حنحشيها ودخليها الفريزر للخطوه الجايه
الحشو :
براحتك خالص اختارى اى حشوه من دول 
1) زبيب
2) جوز هند معجون بشويه لبن صغيرين 
3)مكسرات 
4) صوص الطوفى وهو ده الل انا عملته 
مقادير صوص الطوفى :
1كوب سكر --------1/2 كوب لبن 
الطريقه :
حطى السكر على النار لحد ما يبتدى يدوب ولونه يبقى بنى فاتح

ننزل باللبن حتلاقى السكر اتخشب وبقى زى الحجر ولا تقلقى واعملى نفسك مش واخده بالك ووهدى النار وقلبى قلبى قلبى 
حيدوب وقوامه يتقل فى ناس بتحط بدل اللبن كريمه لبانى أو كريم شانتيه وطبعا دول الاحسن بس ماكانش عندى حطيت لبن

 

1. نطلع قالب الشيكولاته وبالمعلقه نحشيه بالطوفى وممكن لو مش بتحبى الطوفى لانه جامد تحطى زبيب او مكسرات ودخليها الفريزر شويه

2-وبعدين غطى الحشو بشويه شيكولاته

 دخليها الفريزر شويه كمان وبعدين طلعيها وخبطى القالب خبطه خفيفه حتنزلك الشيكولاته بألف سلامه وبألف هنا وشفا 
ملحوظه 
صوص الطوفى بيكون جامد مش طرى خلى باللك احسن تكسرى سنانك يعنى تمصيه زى البونبونى كده 
او ريحى دماغك واحشى الشيكولاته مكسرات